有日診所坐爆人，老中青幼款款齊～
有位小姐推門而入，我立即閉氣！你老闆呀，嗰陣味頂癮到呀…唔係臭狐，係好似用咗花園街100蚊6枝嗰啲香水沖完涼咁…
小姐:登記呀
我破氣了:咳，咳，好…
小姐可能見熱，隨手拎起枱前嘅單張喺度撥吓撥吓，撥吓撥吓，唔知我係咪索啲殺蟲劑索得太耐，搞到我有啲幻覺…我好似見到有舊屎喺度撥吓撥吓…
突然！哪來的勇敢小朋友:媽咪，好臭呀！
媽眼神慌張咁望向小姐，再作狀要掩住小朋友把口:殊！冇禮貌！
舊屎…妖，小姐停頓了撥撥，逐步移動向母子身邊坐低咗…
小朋友:媽咪…好臭呀，姨姨好大陣味…
小姐露出典型金魚佬笑容:dee～dee～你講嗰個姨姨係咪我呀？我係姐姐喎！
妖！邊個應咪邊個係屎忽鬼囉！
媽媽:對唔住呀小姐，唔好意思呀小姐！
小姐:唔緊要～姐姐呢啲係香，唔係臭～記住呀deedee～
可憐嘅小朋友應該仲未識判斷真假是非黑白香定臭，正當佢喺度迷惘緊嘅時候…
“咁都叫香！阿伯爺公條底褲唔洗一個月都好香咯！”坐喺對面嘅婆婆篤住枝枴杖爆肚…
I am sorry，唔關我事㗎！我由頭到尾都坐喺度呼氣吸氣呼氣咋！唏，阿婆你又係嘅！邊有人咁比喻㗎？
Search